Mae'r Rhwydwaith Niwrolegol Strategol yn cydweithio â CEDAR i gynnal ymarfer cwmpasu mewn perthynas â llwybrau niwroadsefydlu yng Nghymru. Ar hyn o bryd, yng Nghymru, mae diffyg darpariaeth gwasanaeth ar gyfer niwroadsefydlu Lefel 2 i gleifion nad ydynt yn addas ar gyfer gwasanaethau arbenigol a ariennir gan Gydbwyllgor Comisiynu GIG Cymru ac sydd hefyd y tu allan i lwybrau strôc. Mae cyflyrau sydd yn aml angen niwroadsefydlu lefel 2 yn cynnwys, ond nid ydynt yn gyfyngedig i, anaf trawmatig i'r ymennydd, gwaedlif is-arachnoid, sglerosis ymledol, syndrom Guillain-Barré, sy'n gofyn am adsefydlu amlddisgyblaethol dwys gan dîm sydd â gwybodaeth arbenigol. Mae effeithiau'r angen heb ei ddiwallu hwn yn cynnwys canlyniadau iechyd gwaeth, arosiadau hirach yn yr ysbyty ac anghenion gofal hirdymor mwy a'r costau cysylltiedig.
Bydd CEDAR yn cynnal ymarfer cwmpasu byr o'r llenyddiaeth sydd ar gael i asesu'r sylfaen dystiolaeth gyfredol. Bydd hyn yn cael ei ddilyn gan grwpiau ffocws i ymgysylltu â rhanddeiliaid allweddol yng Nghymru er mwyn ymchwilio a disgrifio'r sefyllfa bresennol a'i heffaith ar lwybrau adsefydlu eraill, mynediad pobl at wasanaethau adsefydlu a chanlyniadau pobl, gyda'r nod o nodi'r bylchau yn y llwybr adsefydlu.