PROMs, Gwaith Cyfieithu ac Iaith mewn Iechyd

Mae CEDAR yn gweithio gyda Chanolfan Gwerth mewn Iechyd Cymru i gyfieithu a dilysu holiaduron iechyd o'r enw PROMs (Mesurau Canlyniadau a Adroddir gan Gleifion). 

 

Beth yw PROMs?

Mae PROMs yn setiau o gwestiynau a gwblhawyd gan gleifion a all ein helpu i ddeall symptomau ac ansawdd bywyd pobl. Maent yn cael eu defnyddio gan y GIG i asesu a gwella'r driniaeth a'r gofal y mae'n eu darparu.

Gan fod y data a gesglir o PROMs yn gallu dylanwadu'n drwm ar y dewis o driniaethau, gwasanaethau a pholisi iechyd, rhaid felly i'r holiaduron iechyd hyn fod mor gadarn â phosibl, er mwyn casglu'r data mwyaf cywir. Cânt eu datblygu gyda phrosesau gwyddonol i sicrhau dilysrwydd a dibynadwyedd ar gyfer y perfformiad gorau.

 

Pam a sut mae PROMs yn cael eu cyfieithu i'r Gymraeg?

Er mwyn defnyddio PROMs yng Nghymru, rhaid eu cyfieithu i'r Gymraeg yn unol â gofynion cyfreithiol ac er tegwch a chynwysoldeb i siaradwyr Cymraeg. Fodd bynnag, mae cyfieithiad gwael yn bygwth y gwaith dilysu a wneir yn ystod datblygiad y PROM Saesneg.

O ganlyniad, mae tîm CEDAR yn dilyn proses gyfieithu wedi'i haddasu o Ganllawiau ISPOR (International Society for Pharmacoeconomics and Outcomes Research).

 

Mae'r dull cyfieithu yn cynnwys:
1)    Blaen-gyfieithiad
Dau gyfieithiad o Saesneg i’r Gymraeg gan gyfieithwyr cymwys ac annibynnol.
2)    Cymodi
Cyfunir y ddau flaen-gyfieithiad gan drydydd person i greu un fersiwn Cymraeg.
3)    Ôl-gyfieithiad
Dau ôl-gyfieithiad o’r Gymraeg i Saesneg gan gyfieithwyr cymwys ac annibynnol. Yna, cymharir yr ôl-gyfieithiadau gyda’r PROM Saesneg gwreiddiol i ddiystyru unrhyw anghysondebau.
4)    Dilysu’r cyfieithiad
Mae tîm CEDAR yn ymgysylltu ag o leiaf pump i ddeg o siaradwyr Cymraeg ac yn gofyn iddynt brofi'r cyfieithiad er mwyn sicrhau bod y Gymraeg yn glir ac yn ddealladwy. 
5)    Adolygiad o’r Dilysiad
Mae CEDAR yn adolygu'r adborth gan siaradwyr Cymraeg ac yn addasu'r cyfieithiad, lle bo'n briodol. 

 

Iaith mewn Iechyd

Beth yw Iaith mewn Iechyd?

Mae Iaith mewn Iechyd yn grŵp a lansiwyd yn ddiweddar o wirfoddolwyr Cymraeg sy'n ein helpu i wirio a gwella cyfieithiadau Cymraeg o PROMs (holiaduron meddygol) a ddefnyddir ledled GIG Cymru. 

Wrth gyfieithu'r dogfennau hyn, nid cywirdeb gair-am-air yw'r unig ffactor i'w ystyried. Rhaid hefyd sicrhau bod siaradwyr Cymraeg yn eu deall yn yr un ffordd ag y mae siaradwyr Saesneg yn ei wneud.

Dyma rôl Iaith mewn Iechyd yn y broses.

 

Pam mae angen EICH help arnom?

Ar ôl i ni gyfieithu PROMs i'r Gymraeg, mae angen i ni sicrhau bod y cyfieithiad yn:

•    Hawdd ei ddeall gan ystod eang o siaradwyr Cymraeg
•    Mor gywir mewn ystyr â'r fersiwn Saesneg

Nid oes angen unrhyw brofiad arbennig arnoch chi, dim ond parodrwydd i rannu eich barn onest.

Dyma beth mae cymryd rhan yn ei olygu:
•    Cael sgwrs anffurfiol, gyfeillgar gydag aelod o'n tîm
•    Darllen ac adolygu cyfieithiad gyda'ch gilydd
•    Rhoi eich barn ynghylch a yw'r Cymraeg yn glir ac yn naturiol
•    Awgrymu gwelliannau os nad yw rhywbeth yn ymddangos yn hollol iawn i chi

Mae eich adborth yn siapio ansawdd gofal dwyieithog GIG Cymru yn uniongyrchol.

 

Sut ydw i’n cofrestru?

Os hoffech chi helpu i wella gofal y GIG i siaradwyr Cymraeg, ymunwch â'n grŵp Iaith mewn Iechyd.

Pan fyddwch chi'n cofrestru:
•    Byddwn yn storio eich manylion cyswllt yn ddiogel
•    Byddwn yn gofyn (dim ond os ydych yn hapus i rannu) a oes gennych unrhyw gyflyrau iechyd ar hyn o bryd neu a ydych chi wedi profi cyflwr iechyd yn y gorffennol, fel y gallwn gysylltu â chi am holiaduron perthnasol
•    Efallai y byddwn yn cysylltu â chi o bryd i'w gilydd i'n helpu i brofi cyfieithiadau o ddogfennau eraill
•    Bydd eich gwybodaeth yn cael ei thrin gyda chyfrinachedd llwyr

Cwblhewch ein ffurflen cofrestru drwy sganio'r cod QR uchod neu drwy glicio ar y ddolen hon: https://integration2.cavuhb.nhs.wales/surveys/?s=38JJJ9CX99JX83NW 

Anfonwch e-bost atom yn: iaithmewniechyd.CEDAR.cav@wales.nhs.uk

Dilynwch ni ar Instagram: @iaithmewniechyd_gig

 

Beth os byddaf yn newid fy meddwl?

Dim problem. Ar ôl cofrestru, byddwn yn cadarnhau popeth trwy e-bost. Os ydych chi’n penderfynu y byddai'n well gennych beidio â chymryd rhan, anfonwch e-bost atom a byddwn yn dileu eich manylion cyswllt — ni fyddwn yn gofyn unrhyw gwestiynau.

Beth os oes gen i unrhyw gwestiwn ynglŷn â chymryd rhan?
Mae croeso i chi gysylltu â ni gydag unrhyw gwestiwn drwy e-bost (iaithmewniechyd.CEDAR.cav@wales.nhs.uk) neu alwad ffôn (02921844056)